काठमाडौँ– पाकिस्तानका ६ सय ५० शिक्षिकाले दुई वर्षदेखि तलब प्राप्त नगरेको पाइएको छ । पाकिस्तानबाट प्रकाशित हुने डन अखबारका अनुसार पञ्जाब प्रान्तको मुजफरगढका शिक्षिकालाई दुई वर्षदेखि तलब दिइएको छैन ।
आधारभूत शिक्षा सामुदायिक विद्यालय एवम् राष्ट्रिय मानवविकास आयोगद्वारा सञ्चालित विद्यालयमा कार्यरत महिला शिक्षिकाहरुले तलब नपाएका हुन् । उनीहरुले सरकारले आफूहरुको बेवास्ता गरेको र आफ्नो आर्थिक अवस्था झन झन खराब बन्दै गएको समेत बताएका छन् ।
अनौपचारिक विद्यालयमा अध्यापन गराउँदै आएकी अजरा बिबीले आफूले दुई वर्षदेखि तलब नपाएको बताइन् । उनले स्थानीय पसलबाट उधारोमा सामान किन्ने गरेको बताउँदै तलब नपाउँदै साहुको ऋण समेत तिर्न नसकेको गुनासो गरिन् ।
उनले सरकारी अधिकारीहरुले तलब उपलब्ध गराउने बाचा गरेको भएपनि त्यो बाचा पूरा नगरेको बताइन् । पञ्जाब सरकारले आर्थिक वर्ष २०२१–०२२ का लागि यस्ता अनौपचारिक विद्यालयलाई भनेर १ अर्ब ६१ करोड पाकिस्तानी रुपैयाँ बजेट छुट्याएको जनाइएको छ ।
यद्यपि शिक्षिकाहरुले भने तलब पाएका छैनन् । पञ्जाबमा अनौपचारिक विद्यालयमा ७ हजारभन्दा धेरै महिला शिक्षिका कार्यरत रहेको डनले उल्लेख गरेको छ ।
