वीरगञ्ज, १९ कार्तिक
नेकपा एमाले जीतपुरसिमरा नगर कमिटिका उपाध्यक्षसहित लगभग ३ सय जना नेकपा एकिकृत समाजवादी (एस) मा प्रवेश गरेका छन् । नगर कमिटिका उपाध्यक्ष बिरेन्द्र गिरिसहित लगभग ३ सय जना नेता कार्यकर्ता नेकपा एकिकृत समाजवादीमा प्रवेश गरेका हुन् । जीतपुरसिमरा उपमहानगरपालिका वडा नम्बर ७ जीतपुरमा आयोजित पार्टी प्रवेश कार्यक्रमका बीच गिरिसहित ३ सय जना एमालेका नेता कार्यकर्ता नेकपा एकिकृत समाजवादीमा प्रवेश गरेका हुन् ।
पार्टी प्रवेश गर्नेहरुमा उपाध्यक्ष गिरिसहित एमालेका प्रभावशाली नेता कपुरराज पुरी, मिरा पुरी, बिष्णु अधिकारी, मोजाहिर अंसारी, कबिता देवी चौधरी, कृष्ण प्रसाद गुप्ता लगायत रहेका छन् । उनीहरुलाई ५ दलिय गठबन्धनको तर्फबाट बारा क्षेत्र नम्बर ४ का प्रतिनिधिसभा सदस्य उम्मेदवार कृष्ण कुमार श्रेष्ठ किशानले टिका र खादा लगाएर स्वागत गरेका थिए ।
सो अवसरमा नेकपा एमालेका नेता कार्यकर्ताहरुलाई स्वागत गर्दै प्रतिनिधिसभा सदस्य उम्मेदवार श्रेष्ठले एमालेबाट देश विकास नहुने धारणा राखेका छन् । पार्टी प्रवेश कार्यक्रममा बाराको क्षेत्र नम्बर ४ (ख) बाट प्रदेश सभा सदस्यका उम्मेदवार जितेन्द्र सोनलले पनि सत्ता गठबन्धनको जितले मात्रै देश समृद्ध बन्ने दावी गरे । मंसिर ४ गतेको निर्वाचनमा पाँच दलीय गठबन्धनका उम्मेदवारलाई मतदान गरेर बिजयी बनाउन पनि उनले आग्रह गरेका छन् ।
