Online News Portal

सखुवाप्रसौनी गाउँपालिका : गाडी मर्मतको नाममा लाखौं घोटाला, एम्बुलेन्समा पनि छाडेनन्

236

वीरगंज (पर्सा), १८ असार ।

अरुण  कुशवहा

पर्साको सखुवाप्रसौनी गाउँपालिकाका अध्यक्ष र प्रमुख प्रशासकीय अधिकृतले गाडी मर्मतको नाममा लाखौ घोटाला गरेका पाइएको छ । अध्यक्ष जसवन्त यादव र प्रमुख प्रशासकीय अधिकृत देवनाथ साहको मिलोमतोमा पालिकाका गाडी मर्मत सम्भारको नाममा लाखौ घोटाला भएको पाइएको हो ।

गाउँपालिकामा युवाले नेतृत्व लिएपछि अब विकास हुन्छ भन्ने पालिकाबासीको आशामा निराशा छाएको छ । एक वर्षको कार्यकाल सम्हालेका अध्यक्ष जसवन्त यादवको कार्यकाल अत्यन्त विवादित रह्यो । उनले भ्रष्टाचारमा पिएचडी गरेका प्रमुख प्रशासकीय अधिकृत देवनाथ साहको मिलोमतोमा अन्धाधुन्द घोटाला गरेका छन् । इन्धन खर्चदेखि नातेदार भर्तिकेन्द्र हुँदै पालिकामा रहेको गाडी मर्मतको नाममा लाखौं घोटाला गरेको पाइएको छ । पालिकामा रहेको स्कर्पियो, एम्बुलेन्स, टिपर, दमकल, जेसिबी तथा अन्य गरि ४३ लाख ७२ हजार ८७५ रुपैया खर्च गरिएको पाइएको छ ।

स्कर्पिओ मर्मतमा पालिका अध्यक्ष जसवन्त यादवले गरेको खर्च आँकडा हेर्दा जो कोहीले पनि सहजै अनुमान लगाउन सक्छ । स्कर्पियो मर्मतको नाममा एक वर्षको अवधिमा मात्रै १३ लाख ६६ हजार ६४१ रुपैयाँ खर्च गरिएको छ । यसरी मर्मत सम्भारको नाममा मात्रै वर्षेनी साढे १३ लाख रुपैया बढि खर्च गर्ने हो भने ५ वर्षमा नयाँ स्कर्पियो आउँछ । स्कर्पिया मर्मतको नाममा पालिकाबाट २०७९ जेठ १६ गते १ लाख ९१ हजार १६ रुपैयाँ, २०७९ असार १९ गते २ लाख ७ हजार ९० रुपैयाँ, २०७९ भदौ २० गते २ लाख ४० हजार ४५१ रुपैयाँ, २०७९ पुस ९ गते ३ लाख ८१ हजार ५७५ रुपैयाँ, २०७९ पुस १० गते ४६ हजार २४९ रुपैयाँ, २०७९ माघ १२ गते १ लाख ७९ हजार ७७५ रुपैयाँ, २०८० जेठ १४ गते ६० हजार २१० रुपैयाँ तथा २०८० जेठ १७ गते ६० हजार २७५ रुपैयाँ निकाशा गरिएको छ ।

कुनै महिनामा एक दिनको अन्तरालमा मर्मत गरिएको पाइएको छ । स्कर्पिया मर्मतमा अनुमानित खर्च कति हुन्छ भन्ने सहजै अनुमान लगाउन सकिन्छ तर एक दिनको अन्तरालमा मर्मत गरिएको छ । यो कुन मर्मत हो ? मर्मत हो कि मर्मतको नाममा घोटाला हो ? सहजै अनुमान लगाउन सकिन्छ । पुस महिनाको ९ र १० गते दुई दिन लगातार मर्मत गरिएको तथ्याँकले देखाएको छ । यसबाट अध्यक्षको करतुत र प्रमुख प्रशासकीय अधिकृतको सहयोग छर्लङ्ग भएको छ ।

यति मात्रै कहाँ हो र अध्यक्ष एवं अधिकृतको मिलोमतामो एम्बुलेन्स खर्चको नाममा पनि घोटाला भएको छ । एम्बुलेन्स खर्चको नाममा पालिकाबाट १० महिनाको अवधिमा १९ लाख ३९ हजार ८६७ रुपैयाँ पास गरिएको छ । सखुवाप्रसौनी गाउँपालिकामा दुईवटा एम्बुलेन्स छन्, जसको मर्मत खर्च १० महिनाको अवधिमा १९ लाख बढि छ । यस्तो अनुपातमा मर्मत खर्च लाग्ने हो भने दुई तीन वर्षमा नयाँ एम्बुलेन्स आउँछ । यतिको निर्लज्ज भ्रष्टाचार भएको पालिकामा । खुलेयाम अध्यक्ष र अधिकृतको मिलोमतामो अन्धाधुन्ध मर्मतको नाममा पैसा निकासा गरिएको छ ।

दुईवटा एम्बुलेन्स खर्च विस्तृत रुपमा प्रस्तुत गरिएको छ । महुवन एम्बुलेन्समा २०७९ भदौ १७ गते ५८ हजार ६६१ रुपैयाँ, २०७९ असोज ५ गते ८९ हजार १९६ रुपैयाँ, २०७९ असोज २६ गते ८९ हजार १९६ रुपैयाँ, २०७९ मंसिर २३ गते १ लाख ४९ हजार ९८७ रुपैयाँ, २०७९ चैत ३० गते २२ हजार, २०८० जेठ ७ गते २ लाख ६३ हजार ९७६ रुपैयाँ, यसैगरि मधुवन मथवल एम्बुलेन्समा २०७९ असोज ५ गते ७२ हजार ६१७ रुपैयाँ, २०७९ मंसिर २३ गते १ लाख ३० हजार ४९४ रुपैयाँ, २०७९ पुस १९ गते ७ लाख ४७ हजार ६५० रुपैयाँ, २०७९ फागुन १७ गते २६ हजार ८ सय रुपैयाँ, २०८० जेठ ७ गते १ लाख ३९ हजार २९० रुपैयाँ तथा व्यक्तिगत खर्च २०७९ असोज ३० गते १ लाख ५० हजार रुपैया निकाशा भएको छ ।

यसैगरि टिपर मर्मतको नाममा २०७९ जेठ १६ गते १ लाख ३० हजार २०० रुपैयाँ, २०८० जेठ ७ गते ३३ हजार रुपैयाँ निकाशा गरिएको छ । दमकल मर्मत खर्चको नाममा २०८० वैशाख ५ गते १ लाख ३७ हजार ६९० रुपैयाँ, जेसिबी मर्मत खर्चको नममा २०७९ असोज ५ गते ४ लाख ८ हजार ९ रुपैयाँ, २०७९ पुस १२ गते ७० हजार ३४२ रुपैयाँ, २०८० वैशाख ५ गते ७५ हजार ९६९ रुपैयाँ, २०८० वैशाख ७ गते २७ हजार ७ सय रुपैयाँ, २०८० वैशाख २५ गते १ लाख १५ हजार ४९७ रुपैयाँ तथा २०८० जेठ १२ गते ४८ हजार १६० रुपैयाँ निकाशा गरिएको छ ।

Leave A Reply

Your email address will not be published.